© 2023 American Society of Addiction Medicine. Tout dwa rezève. ASAM.org
4
APÈSI SOU TRETMAN AN
Pandan evalyasyon an, klinisyen an pral idantifye bezwen sipò sikolojik
ak sipò sosyal pasyan an tou. Gen anpil chans pou li rekòmande sèvis
konsèy oswa sèvis sipò pou gerizon, tankou patisipasyon nan yon
gwoup kote youn ap sipòte lòt. Men, patisipasyon nan sèvis konsèy ak
lòt sèvis sipò yo pa ta dwe obligatwa pou yon moun ka resevwa tretman
ki fèt avèk medikaman. Si pasyan an patisipe nan gwoup kote youn
ap sipòte lòt yo, li enpòtan pou jwenn yon gwoup ki ankouraje moun
itilize medikaman ki pou twoub ki lye ak konsomasyon opyoyid yo.
Malgre yon evalyasyon konplè ak yon evalyasyon medikal enpòtan
pou devlope yon plan tretman, reyalizasyon tout evalyasyon yo pa ta
dwe retade oswa anpeche pasyan an kòmanse pran medikaman yo.
Apre evalyasyon an, klinisyen an pral pale sou tout opsyon tretman
ki rekòmande yo avèk pasyan an. Sitiyasyon chak pasyan diferan,
se poutèt sa, chwazi pi bon opsyon yo se yon desizyon ki pataje ant
pasyan an ak klinisyen an.
Gen twa (3) chwa prensipal pou medikaman ki la pou trete adiksyon
opyoyid: metadòn (methadone), biprenòfin (buprenorphine), ak
naltrekzòn (naltrexone). Yo rekòmande medikaman sa yo ansanm ak
sèvis konsèy epi lòt sèvis sipò.
Genyen yon seri opsyon tretman ki diferan selon nivo gravite maladi
pasyan an ak lòt faktè. ASAM dekri kat (4) gwo nivo swen:
• ASAM Nivo 1 - Tretman pou pasyan ki pa entène. Pa egzanp,
tretman avèk biprenòfin (buprenorphine) oswa naltrekzòn
(naltrexone) avèk yon pwofesyonèl swen sante prensipal.
• ASAM Nivo 2 - Pasyan ki pa entène ki nan swen entansif oswa
ospitalizasyon pasyèl. Nan pwogram pou Pasyan ki pa Entène ki
nan Swen Entansif (Intensive outpatient, IOP) ak pwogram pou
Ospitalizasyon Pasyèl la (Partial Hospitalization, PHP), pasyan
an resevwa plis pase 9 oswa 20 èdtan sèvis tretman pa semèn,
nan lòd sa a.
• ASAM Nivo 3 - Tretman rezidansyèl rezidans. Pwogram tretman
rezidansyèl yo bay yon tretman nan yon anviwònman konfòtab
ki an sekirite, kote pasyan an ka pratike konpetans ki nesesè pou
gerizon li.
• ASAM Nivo 4 - Tretman pou pasyan ki entène lopital. Tretman
pou pasyan ki entène lopital ka nesesè pou pasyan ki soufri gwo
pwoblèm medikal oswa pwoblèm sikyatrik ki bezwen swen medikal
ak swen enfimye.
Li enpòtan pou pale sou tout diferan opsyon tretman avèk klinisyen an
pou detèmine kiyès ki pi apwopriye.
