© 2023 American Society of Addiction Medicine. Tout dwa rezève. ASAM.org
16
EVALYASYON AK TRETMAN TWOUB KI LYE AK
KONSOMASYON OPYOYID NAN FANM ANSENT YO
Yon twoub ki lye ak konsomasyon opyoyid ki pa trete ka lakoz
gwo risk pou fanm ansent yo. Li ka lakoz kèk konplikasyon gwosès
tankou yon foskouch, yon akouchman anvan lè (prematire), yon
reta nan kwasans fetis la, epi lanmò fetis la.
• Yo ta dwe kòmanse tretman pou twoub ki lye ak konsomasyon
opyoyid la byen bonè pandan gwosès la.
» Jeneralman, yon klinisyen ki gen eksperyans nan pran swen
fanm ansent epi yon klinisyen ki gen eksperyans nan tretman
adiksyon, ta dwe wè pasyan an. Sepandan, si yon espesyalis
pa disponib, fanm ansent yo ta dwe toujou chèche jwenn
swen pandan gwosès la epi pale sou bezwen yo genyen pou
tretman twoub ki lye ak konsomasyon opyoyid yo.
• Klinisyen an ta dwe fè yon evalyasyon medikal pou idantifye
nenpòt pwoblèm medikal ijan ki dwe trete.
» Egzamen medikal la ka gen ladann tès laboratwa, egzamen
fizik, ekografi, ak kesyon konsènan sante mantal pasyan an
ak bezwen endividyèl li yo.
• Bagay ki pi enpòtan yon fanm ansent ki soufri twoub ki lye ak
konsomasyon opyoyid ka fè se, chèche jwenn swen pandan
gwosès la regilyèman ak tretman pou adiksyon.
• Sevraj la ka danjere pandan gwosès la. Pasyan yo ta dwe travay
avèk klinisyen yo a pou jere sevraj la, si yo gen entansyon
sispann oswa diminye konsomasyon opyoyid yo a (tankou
opyoyid sou preskripsyon yo).
• Klinisyen an ta dwe pale ak pasyan an konsènan risk ak
avantaj diferan opsyon tretman yo genyen. Yo ta dwe pran yon
desizyon ansanm, ki baze sou sa ki pi bon pou pasyan an.
• Metadòn (methadone) ak biprenòfin (buprenorphine) se
tretman ki pi efikas ki disponib pou fanm ansent ki soufri
twoub ki lye ak konsomasyon opyoyid. Klinisyen an ka
rekòmande pou pasyan an entène lopital lè li kòmanse
pran medikaman an, espesyalman nan twazyèm trimès la.
Sepandan, pou pifò pasyan yo, yo ka pran medikaman sa yo
san danje nan yon anviwònman ki pou pasyan ki pa entène.
