© 2023 American Society of Addiction Medicine. Tout dwa rezève. ASAM.org
8
MEDIKAMAN POU ADIKSYON OPYOYID
Metadòn (methadone) ak biprenòfin (buprenorfin) se tretman ki
pi efikas ki disponib pou yon adiksyon opyoyid ki aktif. Naltrekzòn
(naltrexone) se yon tretman efikas pou anpeche yon nouvo chit
kay pasyan ki pa fizikman depandan ankò pou opyoyid. Pifò plan
tretman yo gen ladan yo yon seri medikaman. Kalite medikaman
yo chwazi yo depann de yon seri faktè ki gen ladan yo nivo gravite
maladi pasyan an, nenpòt maladi ki rive an menm tan, aksè a
diferan fòm tretman, ak preferans endividyèl yo.
• Tout medikaman FDA apwouve yo—ki gen ladan metadòn
(methadone), biprenòfin (buprenorfin) ak naltrekzòn
(naltrexone)—pou tretman twoub ki lye ak konsomasyon
opyoyid ta dwe disponib pou tout pasyan yo.
• Yo rekòmande pou yon moun jwenn konsèy lè l ap itilize
nenpòt nan medikaman sa yo. Sepandan, konsèy la pa ta
dwe obligatwa pou yon moun ka resevwa tretman ki fèt avèk
medikaman an.
• Yo ta dwe konsidere preferans pasyan an, antesedan li, ak nivo
gravite maladi li a lè y ap deside ki medikaman ki pi bon pou
chak pasyan.
• Chak medikaman aji yon fason diferan epi li genyen pwòp risk
ak avantaj li. Depi yo kòmanse, yo ka pran medikaman sa yo
san danje pandan plizye ane. Klinisyen an ak pasyan an ta dwe
egzamine ansanm risk ak avantaj chak medikaman.
• Lè yo itilize yo kòrèkteman, medikaman sa yo ede retabli ekilib
nan pati nan sèvo a ki afekte avèk adiksyon an, konsa yo ede
pasyan yo jere adiksyon yo a pou yo ka geri.
• Pa gen okenn lè espesifik pou itilizasyon medikaman yo. Li diferan
pou chak pasyan. Gen kèk pasyan ki ka bezwen medikaman
pandan plizyè ane.
• Gen kèk moun ki nan sitiyasyon espesyal tankou gwosès,
pwoblèm sante mantal, doulè, oswa ki nan sistèm jistis penal
la. Yo ta dwe pale sou pwoblèm sa yo ak klinisyen yo a nan lide
pou jwenn bon medikaman ki adapte ak bezwen yo a.
• Adolesan yo ak moun k ap ba yo swen yo ta dwe pale sou
opsyon medikaman yo avèk klinisyen yo a tou.
Si premye medikaman yo chwazi a pa efikas, pasyan an
ta dwe pale avèk klinisyen an konsènan yon chanjman
medikaman ki ka pi efikas pou reponn a bezwen pasyan an.
