9
Biprenòfin (buprenorphine)
• Biprenòfin lan (buprenorphine) aji sou menm pati sèvo
medikaman opyoyid yo aji a. Li ede estabilize pati sa yo yon fason
pou diminye dezi pou konsome opyoyid epi pou anpeche sentòm
sevraj yo.
• FDA fenk apwouve plizyè nouvo fòmil biprenòfin (buprenorphine)
pou tretman twoub ki lye ak konsomasyon opyoyid.
• Biprenòfin (Buprenorphine) vini sou fòm tablèt oswa fim (pou
itilize chak jou), piki a liberasyon pwolonje (chak semèn oswa
chak mwa) epi yon enplan a liberasyon pwolonje yo mete anba po
(chak 6 mwa). Yo ka ajiste dòz la alavni pou jwenn dòz ki pi bon
pou pasyan an.
• Anpil vèsyon medikaman sa a konbine avèk nalokzòn (naloxone)
pou anpeche yon move itilizasyon. Jwenn plis enfòmasyon sou
nalokzòn (naloxone) nan paj 12. Lè yo mal itilize (pran piki,
rale nan nen, oswa lòt) nalokzòn (naloxone) lan nan medikaman
biprenòfin (buprenorphine) lan, sa ka vin lakoz sentòm sevraj.
• Pwoteksyon asirans lan ak pri asirans lan ka ede detèmine ki
Tretman yo ta dwe chwazi. Klinisyen an ap asire pasyan an
genyen yon dòz ak fòm ki reponn ak bezwen medikal pasyan an.
• Pasyan yo ka bezwen wè klinisyen yo a souvan nan kòmansman
tretman an, jiskaske sentòm adiksyon yo a estabilize.
• Tretman biprenòfin (buprenorphine) lan ka kòmanse swa nan kay
la oswa nan biwo yon doktè. Yo konsidere toulede opsyon yo kòm
opsyon ki san danje epi ki efikas nan kòmansman.
• Pasyan yo ta dwe rete tann jiskaske yo genyen sentòm sevraj
opyoyid lejè a modere anvan yo pran premye dòz biprenòfin lan
(buprenorphine). Si yo pran biprenòfin lan (buprenorphine) twò
bonè, li ka lakoz sentòm sevraj olye pou li soulaje yo.
• Anpil pasyan dwe kontinye pran biprenòfin (buprenorphine) lan
pandan yon peryòd tan pwolonje. Lè pasyans an sispann pran
biprenòfin lan (buprenorphine), sa ka lakoz pasyan an riske fè yon
nouvo chit ak yon ovèdoz. Yo ta dwe sèlman fè sa byen dousman,
sou siveyans atantif klinisyen an.
• Se pa tout klinisyen ki ka preskri biprenòfin (buprenorphine),
kidonk li enpòtan pou jwenn yon klinisyen apwouve ki kapab
preskri medikaman sa a.
• Etid yo te montre tretman avèk biprenòfin lan (buprenorphine)
diminye risk pou pasyan an mouri akoz yon ovèdoz opyoyid.
